Itzultzaile eta interprete, gidoilari, bertsolari, idazle, kultur kudeatzaile, irakasle… euskal kulturaren arlo ugaritan ibilia da Xabi Paya.

Itzulpengintzan eta Interpretazioan lizentziatu zen, EHUn, baina zenbait graduondoko eta master ere egin ditu harrezkero: Euskal Kulturaren Transmisioa masterra, Mondragon Unibertsitatean; Euskal Ikasketetako graduondokoa, Eusko Ikaskuntzaren Asmoz fundazioan; Museoen Zuzendaritza eta Kudeaketako masterra, Mexikoko CLEA Unibertsitateak aitortua; Enpresen Zuzendaritza eta Kudeaketako Executive MBA masterra, EHUn, eta Europako Kultura Modernoei buruzko masterra, Birminghamgo Unibertsitatean. Gidoigintzari buruzko ikastaroak ere egin ditu, Euskal Herrian eta Londresen.

Itzulpengintzaren alorrean, aldibereko interpretazioan eta literatur itzulpenean ibilia da batik bat. Lan aipagarrienen artean dira Tennesee Williamsen Desio izeneko tranbia, Calderón de la Barcaren Bizitza amets eta Bob Dylanen 100 kantu, besteak beste.

Bertsolaritzaren munduan ere badu itzalik: 2004ko Bizkaiko Bertsolari Txapelketako finalera eta 2005eko Euskal Herriko Txapelketako erdi-finalera iritsita, 2006an Bizkaiko Bertsolari Txapelketa irabazi zuen.

Gidoilari ere aritu da ikus-entzunezkoetan: Ai Martin eta Bi eta bat telesailetan, besteak beste; 2026ko antzerki gidoi laburren Cafe Bar Bilbao saria jaso zuen, Ganbarako lana izeneko gidoiagatik.

Berak atondu zuen, halaber, Ahozko Euskal Literaturaren Antologia (Etxepare Euskal Institutua, 2013), eta komikigintzan ere aritua da: besteak beste, Nork eta Nori komikien gidoilari izan zen, Patxi Gallego irudigilearekin elkarlanean, Bertsolari Aldizkariaren enkarguz. Kolaborazio ugari ditu, bestalde, zenbait hedabidetan.

Donostia 2016ko Kultur Zuzendaria izan zen, eta 2021-2026 urteetan, berriz, Getxo Kulturako zuzendaria. 2026ko ekainean, Bilbo Bizkaia Museoak erakundeko zuzendari izendatu zuten.

Loturak

- Wikipedia

- Xabi Payaren lanak Inguma datu-basean

- Linkedin

2026-06-09