Ikasketak Agurainen, Leioan, Gasteizen eta Donostian egin ondoren, borondatezko gizarte lanetan eta Kontzientzi Eragozleen mugimenduan aritu zen lanean.
1986an Eskandinaviarantz abiatu zen, eta beste kultura batzuk ezagutu eta hizkuntza berriak ikasteari ekin zion (katalana, frantsesa, ingelesa...). Bidaiaren buruan, berehala itzuli beharrean, hiru urtez geratu zen Finlandian, bertan bizi, lan egin eta hango hizkuntza ikasten. Hain zuzen ere, horrek bultzatu zuen 2013an argitaratu zen Euskara-Finlandiera hiztegia ontzera, bi hizkuntza txikiren arteko zubigintzan.

Euskal Herrira itzuli eta, 1991n, itzulpengintzari ekin zion. Harrezkero lanbide horretan dihardu. 1998an Bakun itzulpen eta argitalpen enpresa sortu zuen. Enpresa horrek zerbitzu ugari eskaintzen ditu, batik bat argitaletxeei (testuen sorkuntza, itzulpenak, zuzenketak, diseinua eta maketazioa...), baina baita nazioarteko erakunde, gizarte mugimendu eta GKEei ere.

Joseba Ossa idazle ere badugu, haurrentzako zenbait narratiba lan idatziak baititu (Inari, Laponiako lore eta Finlandiako ipuin eroak tarteko). Euskara eta literaturako zenbait testu libururen egile ere bada.

EIZIEko lehendakari izan zen 2005-2006 urteetan.

Loturak

• Suomiaren eta Itakaren arteko bidaia elkarrizketa (Berria, 2022)
• Joxeba Ossa Auñamendi Entziklopedian
• Joxeba Ossa Idazleen Elkartean

2023-07-29