Itzulpengintza eta Interpretazioan lizentziatu ostean (2006), Giltza-Edebe argitaletxean eta Labayru Fundazioan aritua hezkuntzarako materialgintzan. Euskal Filologia eta Hizkuntzalaritza masterra bukatuta (2010), Euskarara ekarritako literaturaren dibulgazio-kritika aztertzen ikerketa-lana argitaratu zuen (Labayru eta Amorebieta-Etxanoko Udala, 2011), Santi Onandia bekari esker. Artean, itzultzaile autonomo ere ibili izan da. Euskara eta Euskal Kulturako irakasle jardun du 2011ko irailetik 2015eko irailera bitartean, Michel-Montaigne Bordeaux-3 eta Sorbonne Nouvelle-Paris 3 unibertsitateetan. Masterra bukatuz geroztik euskal itzulpengintza-ikasketetako ikerketari lotu zaio. Lektoretzatik bueltan itzulpengintza-eskolak eman ditu urtebetez UPV/EHUko Gasteizko Letren Fakultateko Hizkuntzalaritza eta Euskal Ikasketak Sailean (2015/2016 ikasturtea), eta egun UPV/EHUko Bilboko Irakasleen Eskolan dihardu.

Bertsoari lotu zitzaion garai batean (kantuan eta kronikagile, besteak beste); baina, ikerketan murgilduta, utzi egin zion praktika biziari. Edonola ere, bertsoa eta itzulpena lotu izan ditu inoiz edo behin, “Shakespeare bertsolari” mintegian adibidez, edo “Europa bat-batean” jardunaldietako saioetako inprobisatzaileen artean zubi-lanetan).

EIZIEren Zuzendaritza Batzordean jardun zuen 2008-2013 urteetan, eta, gaur egun, Elkartearen ordezkari da CEATL erakundean.

Senez aldizkarian ez ezik, argitaratuak ditu zenbait artikulu beste aldizkari batzuetan ere, literaturari eta itzulpengintzari buruz: Lapurdum, Euskera, Estudios de Traducción, Pasavento…

Bestelako lan batzuk ere egina da. Hainbat sarrera idatzi ditu Auñamendi entziklopedian: bertsolariak, itzultzaileak, idazleak…, bai eta zenbait artikulu ere Euskal Literaturaren Hiztegian (EHU-Euskara Institutua).

Loturak

• Elkarrizketa elearazi blogean
• Miren Ibarluzearen lanak Inguma datu-basean
• Wikipedia

(Argazkia BDB datu-basetik hartua)

2016-10-27