Txiki-txikitatik hizkuntzek liluratuta, Itzulpengintza eta Interpretazioko Gradua ikasi nuen Gasteizen (EHU, 2022), eta guztiz maitemindu nintzen itzulpengintzarekin. Gradua amaitzean, Kulturaz Sormen Beka irabazi nuen Maria Oses itzultzaile eta lagun-minarekin, eta elkarrekin itzulpen eta sorkuntzan oinarritutako ikuskizuna sortu genuen (‘Intsumisoena’).

Ondoren, Austriara joan nintzen gaztelaniazko hizkuntza-laguntzaile eta, han nintzela, ikus-entzunezkoak itzultzen hasi nintzen. Zinemaldian Harreman Publikoetako Sailean lan egiteko itzuli nintzen hainbat hilabetez Donostiara eta, beste tarte luze batez Austrian egon ondoren, berriz naiz bueltan Euskal Herrian.

Gaur egun, era askotako itzulpen-lanetan nabil –besteak beste, poesia-bilduma eta errezeta-liburuekin–, baita itzulpengintzari buruz ahal bezainbeste ikasten ere.

Itzultzeaz gain, musikazale amorratua naiz, eta izugarri gustatzen zait kulturako arlo ezberdinak disfrutatu eta batzea.

2024-03-18