Euskal Herriko Unibertsitateko irakaslea da Informatika Fakultatean 1985etik, Lengoaia eta Sistema Informatikoak sailean. Euskaltzain urgazlea da 2006tik. Hainbat sari irabazi ditu ipuin-lehiaketetan; 2010eko Donostia Hiria, besteak beste, Deception Island narrazioarekin (Alberdania, 2010). 2011n, berriz, Argi-itzalen neurria (Elkar, 2011) ipuin bilduma argitaratu zuen. Literaturazalea ez ezik argazkizalea ere bada (artzubi), eta Ikiliko txondorra argazki-liburua argitaratu zuen 2010ean (Urmara Elkartea, 2010).

Hizkuntzaren prozesamenduaren arloan aritzen den Ixa ikertaldeko kidea da, hasiera-hasieratik. Besteak beste, Unibertsitateko, Euskal Autonomia Erkidegoko, Hezkuntza eta Zientzia/Zientzia eta Teknologia Ministerioko hainbat ikerketa-proiektu zuzendu ditu eta horietan parte hartu du, eta ikerketaren arloko enpresekin eta zentroekin kontratuak ere izan ditu. Euskaltzaindiaren Lexikoaren Behatokia proiektuko partaidea izan da 2021era arte.

Ingeniaritza Informatikoan doktorea da, lau doktorego-tesi zuzendu ditu eta 4 ikaslibururen egilekidea da. 100 baino gehiago dira informatikaren, adimen artifizialaren eta hizkuntzalaritza konputazionalaren arloetan egin dituen argitalpenak. Udako Euskal Unibertsitateko Informatika Sailean ere aritu izan da irakasle gisa hainbat urtez, eta sailburua ere izan zen. Euskal komunitate zientifikoaren Inguma datu-basean, berak idatzitako 45 lan baino gehiago agertzen dira.

Itzulpengintzari dagokionez, informatikarekin zerikusia duten zenbait testu tekniko-zientifiko euskaratu ditu bere jardun akademikoan, gaztelania zein ingelesetik. Bere tesi-lana frantsesez osatu zuen aurrena, eta euskaratu egin zuen gero. Literatur itzulpenaren arloan, berriz, Marguerite Duras-en La douleur euskaratu zuen frantsesetik (Literatura Unibertsala. Erein, 2014), eta Margarita Nafarroakoaren Heptamerona euskaratzen dihardu orain frantsesetik (lehen liburua Booktegiren eskutik argitaratu zen, 2021ean).

Loturak

- Xabier Artolaren artikulua Senez aldizkarian, Duras-en Samina itzutzeari buruz.

- Xabier Artolaren produkzioa Inguma datu-basean.

- Xabier Artola Wikipedia entziklopedian.

- Xabier Artola Literaturaren Zubitegian.

- Xabier Artola Auñamendi entziklopedian.

2022-03-24